ଜ୍ଞାନ, ବିଶ୍ଵାସ, ରୀତି, ନୀତି, ବିଧି, ନିୟମ, କଳା ତଥା ସାମାଜିକ ପ୍ରାଣୀ ହିସାବରେ ମଣିଷ ଦ୍ୱାରା ଅର୍ଜିତ ତଥା ସଂରକ୍ଷିତ ଅନ୍ୟାନ୍ୟ ଯୋଗ୍ୟତା ଏବଂ ଆଦର୍ଶର ଏକ ଜଟିଳ ପୂର୍ଣ୍ଣାଙ୍ଗ ଜୀବନ ହେଉଛି ପରମ୍ପରା । ସମସ୍ତ ସମ୍ପ୍ରଦାୟର ଭିନ୍ନ ଭିନ୍ନ ସଂସ୍କୃତି ଓ ପରମ୍ପରା ରହିଅଛି । ସଂସ୍କୃତି ଓ ପରମ୍ପରାର ଜୀବନ ଜୀବିକା ମଧ୍ୟରେ କର୍ମ କର୍ମାଣି, ବିବାହ, ଜନ୍ମ ସଂସ୍କାର, ମୃତ୍ୟୁସଂସ୍କାର, ପର୍ବପର୍ବାଣି ଓ ରୀତିନୀତି ଆଦି ଆଧାରିତ । ବିଂଝାଲ ଜନଜାତିମାନେ ବର୍ଷତମାମ ବହୁ ପର୍ବପର୍ବାଣି ପାଳନ କରିଥାନ୍ତି । ପ୍ରତ୍ୟେକ ପର୍ବର ମୁଖ୍ୟ ଉଦ୍ଦେଶ୍ୟ ହେଲା ପୂର୍ବପୁରୁଷ ବା ଡୁମା ପୂଜା, ଦେବଦେବୀ ପୂଜା ଓ ଭବିଷ୍ୟତ ମଙ୍ଗଳପାଇଁ ପ୍ରାର୍ଥନା । ପର୍ବ ପୂର୍ବରୁ ଏମାନେ ସମସ୍ତ ପ୍ରକାର ଖାଦ୍ୟ ପାନୀୟ ଓ ପୂଜା ଉପକରଣମାନ ସଂଗ୍ରହ କରିଥାନ୍ତି । ପର୍ବପର୍ବାଣି ସମୟରେ ପର୍ବର ଆନୁସଙ୍ଗିକ କର୍ମ ବ୍ୟତୀତ ଅନ୍ୟ କୌଣସି ପ୍ରକାର ଶାରୀରିକ ପରିଶ୍ରମ କରିବାକୁ ପସନ୍ଦ କରି ନଥାନ୍ତି । ବିଂଝାଲ ଜନଜାତିମାନେ ବର୍ଷାଋତୁ ଠାରୁ ଶୀତଋତୁ ପର୍ଯ୍ୟନ୍ତ କୃଷି କର୍ମରେ ଲିପ୍ତ ରହିଥାନ୍ତି । ଶୀତଋତୁ ପରେ ସେମାନଙ୍କୁ କୃଷି କର୍ମରୁ ଅବସର ମିଳେ । ଏହି ସମୟରେ ସେମାନଙ୍କ ଆର୍ଥିକ ଅବସ୍ଥା ସ୍ୱଚ୍ଛଳ ଥାଏ । ତେଣୁ ସେମାନେ ବିଭିନ୍ନ ପ୍ରକାର ପର୍ବପର୍ବାଣିରେ ମାତି ଯାଇଥାନ୍ତି । ବିଂଝାଲ ଜନଜାତିଙ୍କ ପର୍ବଗୁଡ଼ିକ ମୁଖ୍ୟତଃ କୃଷି ଭିତିକ ଓ ଜୀବନ ଜୀବିକା ଆଧାରିତ । ଏହି ପ୍ରବନ୍ଧରେ ବିଂଝାଲ ଜନଜାତିଙ୍କ ବିଭିନ୍ନ ପର୍ବପର୍ବାଣି ସହ କର୍ମ କର୍ମାଣି, କଣାବରା, ଝିଅ ପୁଷ୍ପବତୀ ହେବା ସଂସ୍କାର, ବିବାହ ପ୍ରଥା, ଜନ୍ମ ଓ ମୃତ୍ୟୁ ସଂସ୍କାର ପ୍ରଭୃତି ପ୍ରସଙ୍ଗରେ ଆଲୋକପାତ କରାଯାଇଛି ।
